ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល មានកិត្តិយស សូមឆ្លើយតបបំភ្លឺជូនសាធារណជន និងគណនីហ្វេសបុកឈ្មោះ Nii Nii ដែលបានខមិន (Comment) ក្នុងគេហទំព័រហ្វេសបុក សម្ដេចអគ្គមហាសេនាតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា មានខ្លឹមសារថា÷ ចៅជាសិស្សរៀននៅថ្នាក់ទី៩ក អនុវិទ្យាល័យបឹងគ្រំ សព្វថ្ងៃចៅរស់នៅភូមិបឹងគ្រំក្រោម ឃុំបឹងគ្រំ ស្រុកល្វាឯម ខេត្តកណ្ដាល ។ ចៅមានរឿងសុំឲ្យលោកតាជួយរកយុត្តិធម៌ដល់គ្រួសារចៅនិងប្រជាជនចំនួន ២០គ្រួសារ ពីបទមន្ត្រីប៉ូលិសឈ្មោះ ធួក ចិន្តា ភេទស្រី រស់នៅភូមិបឹងគ្រំក្រោម ដែលបានលួងលោមខ្ចីលុយគ្រួសារចៅរួមទាំងបងប្អូនប្រជាពលរដ្ឋជាង ២០គ្រួសារទៀត មានទឹកប្រាក់សរុបជា ២០ម៉ឺន$។ ឥឡូវមន្ត្រីប៉ូលិស ឈ្មោះ ធួក ចិន្តា បានគេចខ្លួនបាត់ ហើយគ្រួសារចៅនិងប្រជាពលរដ្ឋ២០គ្រួសារបានទៅប្តឹងថ្នាក់លើគេអត់ជួយដោះស្រាយអោយគេបិទសំណុំរឿង។ សូមលោកតាជួយរកយុត្តិធម៌ឱ្យពុកម៉ែចៅនិងអ៊ំពូមីងនៅឃុំបឹងគ្រំផង។ ជាចុងក្រោយ បើចៅនិយាយពាក្យខុសឆ្គងត្រង់ណា សូមសម្តេចតា មេត្តាកុំប្រកាន់ចៅអី។
ក្រោយពីទទួលបានព័ត៌មានខាងលើនេះភ្លាម ដោយមានការចង្អុលបង្ហាញពីក្រុមការងារប្រតិកម្មរហ័ស នៃអគ្គស្នងការដ្ឋាននគរបាលជាតិ
ក្រុមការងារប្រតិកម្មរហ័ស នៃស្នងការដ្ឋាននគរបាលខេត្ត ដឹកនាំដោយលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានចាត់ឲ្យលោកអធិការដ្ឋាននគរបាលស្រុកល្វាឯមស្រាវជ្រាវបំភ្លឺករណីខាងលើជាបន្ទាន់។
ជាលទ្ធផល៖
នៅព្រឹកថ្ងៃទី២០ ខែមករា ឆ្នាំ២០២២ អធិការដ្ឋាននគរបាលស្រុកល្វាឯម បានស្រាវជ្រាវបំភ្លឺឱ្យដឹងថា៖ ឈ្មោះ ពួក ចិន្តា ភេទស្រី ជាមន្ត្រីនគរបាលប៉ុស្តិ៍នគរបាលរដ្ឋបាលបឹងគ្រំ ពិតមែន។ ចំពោះករណីខ្ចីប្រាក់ដែលម្ចាស់គណនីហ្វេសបុកឈ្មោះ Nii Nii បានខមិននោះ អធិការដ្ឋាននគរបាលស្រុកល្វាឯមធ្លាប់ទទួលបានព័ត៌មានអំពីករណីខាងលើនេះដែរ ហើយផ្នែកជំនាញបានណែនាំ ឲ្យពួកគាត់ដាក់ពាក្យបណ្ដឹងនៅអធិការដ្ឋាន ប៉ុន្តែពួកគាត់បានសំណូមពរថាគាត់សុំយកទៅប្ដឹងខាងថ្នាក់លើវិញ។
ក្រោយមកនៅថ្ងៃទី១០ ខែវិច្ឆិកា ឆ្នាំ២០២១ អធិការដ្ឋាននគរបាលស្រុកល្វាឯម បានទទួលដីកាកោះហៅរបស់សាលាដំបូងខេត្តកណ្ដាល កោះហៅឈ្មោះ ធួក ចិន្តា ជាភាគីចុងបណ្ដឹងទៅសាកសួរ។
នៅថ្ងៃទី២៨ ខែធ្នូ ឆ្នាំ២០២១ អធិការដ្ឋាននគរបាលស្រុកល្វាឯម បានទទួលលិខិតជូនដំណឹងរបស់សាលាដំបូងខេត្តកណ្ដាល។ ជូនដំណឹងដល់ភាគីដើមបណ្ដឹងឈ្មោះ យ៉ា ផល្លី ភេទស្រី, ឈ្មោះ រុន ចាន់ធឿន ភេទស្រី និងឈ្មោះ នៅ ចាន់បូរី ភេទប្រុស បញ្ជាក់ថាបានសម្រេចតម្កល់ទុកឥតចាត់ការនូវសំណុំរឿងព្រហ្មទណ្ឌនេះ។
ដូច្នេះអធិការដ្ឋាននគរបាលស្រុកល្វាឯម សូមបំភ្លឺថាករណីនេះគឺជានីតិវិធីរបស់តុលាការ។
អាស្រ័យហេតុនេះ សូមសាធារណជនមេត្តាជ្រាបជាព័ត៌មាន និងកុំមានការភាន់ច្រឡំ៕
