លោក ភឺន ផល្លា បានប្រតិកម្មឆ្លើយតបនឹងការផ្សាយព័ត៌មានដែលចោទថាលោកបានរំលោភយកដីប្រជាពលរដ្ឋនៅស្រុកកោះធំ ខេត្តកណ្ដាល ដែលផ្ទុយពីការចោទប្រកាន់ថា លោកមិនបានយកដីប្រជាពលរដ្ឋនោះទេ គឺបានទិញដី ដោយមានការទទួលស្គាល់ពីអាជ្ញាធរ។ ប្រតិកម្មនេះធ្វើឡើងតាមរយៈសេចក្ដីថ្លែងការណ៍មួយ ដែលចេញដោយការិយាល័យមេធា មេគង្គ សហពាណិជ្ជកម្ម ចុះថ្ងៃទី១៤ ខែសីហា ឆ្នាំ២០២៤។
លោក លី វិទូ មេធាវី ជាមេធាវីតំណាងដោយអាណត្តិឱ្យលោក ភឺន ផល្លា បានរៀបរាប់នៅក្នុងសេចក្ដីថ្លែងការណ៍ថា ឆ្លើយតបនឹងសារព័ត៌មានមួយដែលបានផ្សាយផ្ទាល់ក្រោមចំណងជើងថា “ប្រជាពលរដ្ឋជាង 500 គ្រួសារ បានសំណូមពរទៅដល់អភិបាលខេត្តកណ្តាល ដែលទើបឡើងកាន់តំណែងថ្មី លោក គួច ចំរើន ដែលការចុះផ្សាយនេះគឺមិនត្រឹមត្រូវនោះទេ។
លោក លី វិទូ បាននិយាយនៅក្នុងសេចក្ដីថ្លែងការណ៍ទៀតថា ក្រុមហ៊ុនបានប្រមូលទិញដី ដោយមានការទទួលស្គាល់ពីអាជ្ញាធរត្រឹមត្រូវ និងដោះស្រាយគោលនយោបាយជូនប្រជាពលរដ្ឋក្នុងមូលដ្ឋានឃុំពោធិបាន ស្រុកកោះធំ ខេត្តកណ្តាល និងបានបន្តកាន់កាប់គ្រប់គ្រងប្រើប្រាស់ និងអាស្រ័យផលនៅ លើទីតាំងដីនេះរហូតមក ហើយទីតាំងដីនេះមានប័ណ្ណកម្មសិទ្ធិ (ប្លង់រឹង) ត្រឹមត្រូវធ្វើឡើងស្របតាមនីតិវិធីច្បាប់ ក្នុងនោះ ក្រុម ហ៊ុនបានបោះបង្គោល ជីកព្រំ និងលើកទំនប់ក្រវ៉ាត់ព័ទ្ធជុំវិញទីតាំងដីផងដែរ។
ចង់ដឹងព័ត៌មានលម្អិតសូមអានសេចក្ដីថ្លែងការណ៍ទាំងស្រុងដូចខាងក្រោមនេះ ៖
